BÜGA

Ulteriurs servetschs

Cun il BÜGA avais Vus il Grischun en satg. Profitai er da noss ulteriurs servetschs. Uschia daventa Voss viadi in'aventura.

Bun da savair

Qua chattais Vus respostas a las dumondas las pli impurtantas en connex cun il BÜGA. 

Per ulteriuras dumondas As stat noss railservice gugent a Vossa disposiziun.

Las colliaziuns adattadas chattais Vus directamain online.

Sco alternativa pudais Vus retrair Voss exemplar persunal da l'urari dal Grischun en in uffizi postal u en ina staziun da las VFF, da la Viafier retica u da la Viafier Matterhorn Gottard.

Cun il BÜGA avais Vus via libra tar las suandantas interpresas da transport en il Grischun:

 

  • Viafier retica (incl. ils bus da cumpensaziun e bus Tirano – Lugano)
  • AutoDaPosta
  • Bus da Cuira
  • Bus d'Engiadina
  • Interpresa da transport da Tavau
  • Bus local da Claustra Tavau
  • Bus Silvestri (durant l'entir onn lingia Zernez – Livign, durant la stad Livign – Puntraschigna/Poschiavo)
  • Bus da lingia tirolais (lingia Martina – Landeck/Danuder)
  • Bus dal servetsch d'automobils sidtirolais (Martina – Danuder – Mals)
  • VFF (Cuira – Landquart – Ragaz Bogn)
  • Viafier Matterhorn-Gottard (Mustér – Alpsu)
  • Pendiculara Razén – Veulden

 

Per ils trens ed ils bus cun taxas supplementaras valan disposiziuns spezialas. Ils supplements ston vegnir pajads da tut las passagieras e da tut ils passagiers (vesair ils uraris publitgads). En cas da purschidas spezialas n'èn ulteriuras reducziuns betg pussaivlas.

Cun il BÜGA pudais Vus schizunt viagiar, er sche Vus l'avais emblidà: As drizzai cun in document d'identitad valaivel ad in da noss posts da vendita u As annunziai directamain tar il persunal da controlla u da viadi. (Resalva persunala: 5.00 francs)

Cun il BÜGA profitais Vus da reducziuns da pretsch attractivas tar intginas telefericas grischunas. As infurmai per plaschair directamain tar la teleferica respectiva.


Anc dapli viadis a pretschs da spargn

BÜGA e Mobility

Mobility Carsharing è la cuntinuaziun individuala dal traffic public. In abunament da Mobility avra las portas da 3000 autos en passa 1400 lieus en Svizra. Da tuttas uras ed en autoservetsch. Las portas da Mobility sa laschan dal rest avrir er cun il SwissPass.

Mobility

Park+ride tar la Viafier retica

Profitai – sco client d'in abunament annual – da las cartas annualas da park + rail da la Viafier retica. Tut tenor lieu e tut tenor purschida da plazzas da parcar a la staziun, cun ina reducziun da fin 50 pertschient. 

Abunaments da lingia

Sche Vus viagiais regularmain sin il medem traject, è in abunament da lingia ina buna tscherna – e sa paja gia a partir da trais viadis d'ir e turnar per emna. Da retrair per 7 dis, per 1 mais u per 1 entir onn. In abunament da mesa taxa n'è betg necessari.Abunaments da lingia

Abunament da modul

L'abunament da modul per trajects-zonas-cumbinaziuns. Grazia a l'abunament da modul viagian er pendularis dal / en il Grischun cun pli paucas cartas en la bursa e profitan plinavant d'in rabat da cumbinaziun. Vus pudais cumbinar l'abunament per Voss traject da pendularis cun ina zona colliada al lieu da partenza / d'arrivada u en viadi.

Abunament da modul

Abunaments colliads

Sche Vus viagiais en l'Engiadin'ota u en la regiun Tavau/Claustra, profitais Vus dal consorzi tariffar local. Vus essas mobil er en la Val dal Rain da Cuira grazia a TransReno – cun l'acceptanza vicendaivla da la gronda part dals bigliets e da las cartas tras il Bus da Cuira, l'AutoDaPosta, las VFF e la Viafier retica.

Abunaments colliads

Cartas da plirs viadis

Tgi che na viagia betg regularmain, ma adina puspè sin il medem traject, cumpra il meglier ina carta da plirs viadis: cumprar 1 giada – viagiar 6 giadas. La carta da plirs viadis vala 3 onns, cuntegna 6 viadis simpels, è 20 pertschient pli bunmartgada che in singul bigliet en il Grischun ed è impersunala e pia transferibla. Anc meglier viagian ins mo, sch'ins ha er in abunament da mesa taxa, perquai che cun quel datti la carta da plirs viadis a mez pretsch.

Abunament seven25

Essas Vus pli giuven che 25 onns e gugent en viadi la saira? Alura è l'abunament seven25 gist dretg per Vus. Cun quest abunament viagiais Vus da las 19.00 fin las 05.00 uschè ditg che Vus vulais sin la rait da las VFF, da la Viafier retica sco er da numerusas interpresas da transport privatas en la 2. classa. L'abunament seven25 survegnis Vus sin il SwissPass.

Abunament seven25

Carta junior

La carta junior custa 30.00 francs. Per quest pretsch datti 1 onn a la lunga via libra per uffants tranter 6 e 16 onns. Unica cundiziun: accumpagnament d'in genitur cun in bigliet valaivel u ina carta valaivla. Excepziun: abunaments colliads e purschidas spezialas. La carta junior vala dapertut, nua ch'i vala er l'abunament da mesa taxa.

Carta junior

Carta per viagiar en cuminanza cun uffants

Cun la carta per viagiar en cuminanza cun uffants che custa 30.00 francs, viagia in uffant tranter 6 e 16 onns durant 1 entir onn, accumpagnà d'ina persuna cun in bigliet valaivel u cun ina carta valaivla tras la Svizra. La carta per viagiar en cuminanza cun uffants pon retrair tut ils accumpagnaders pli vegls che 16 onns (p.ex. tatta, padrin, onda e.u.v.) a la staziun. 

Carta per viagiar en cuminanza cun uffants

Cartas dal di cun / senza abunament da mesa taxa

Esser mobil illimitadamain durant in di cun las cartas dal di sco er cun las cartas dal di da spargn per la 1. e per la 2. classa.

Cartas dal di